Jean Asselborn vul excluder l'Ungaria da l'UE

Il minister da l'exteriur dal Luxemburg Jean Asselborn è dal maini che l'Ungaria violeschia las valurs fundamentalas da l'Uniun europeica. Il pajais stoppia perquai vegnir exclus da l'UE ad interim u per adina.

purtret da Jean Asselborn

Legenda da maletgs: Crititgescha las saivs che l'Ungaria construescha cunter ils fugitivs da la guerra: Jean Asselborn. Reuters

«Nus na pudain betg acceptar che las valurs fundamentalas da l'Uniun europeica vegnan violadas massivamain»: Cun questa argumentaziun ha il minister da l'exteriur dal Luxemburg, Jean Asselborn pretendì l'exclusiun da l'Ungaria da l'UE. «Tgi che construeschia saivs cunter fugitivs da guerra sco l'Ungaria u tgi violeschia l'independenza da la giustia e la libertad da pressa duai vegnir exclus per in tschert temp u en il mender cas era per adina da l'UE», ha ditg Asselborn a la gasetta «Welt». L'Ungaria n'avessi oz nagina schanza da vegnir commember da l'UE.

L'UE na possia betg tolerar in «cumportament fauss» sco en il cas da l'Ungaria ha ditg Asselborn. L'exclusiun fiss la suletta pussaivladad per mantegnair la solidaritad e las valurs da l'UE.

RR novitads 07:00