Siglir tar il cuntegn
Inhalt

Exteriur «Jau chal cura ch'jau sun morta»

Ina vita senza giugar n'ha ella betg pudì s'imaginar. L'actura da film franzosa Jeanne Moreau è morta en la vegliadetgna dad 89 onns.

Purtret da Moreau
Legenda: Jeanne Moreau è morta cun 89 onns. Keystone

Jeanne Moreau è stada enconuschenta en sia rolla sco «Femme fatale» tar il public ma era tar ils reschissurs. Sco dunna independenta ed attractiva è ella stada fitg dumandada tar ils producents da film.

Moreau era enconuschenta per sia vusch rauca ed ha duront varga 50 onns giugà en passa 120 films. Tranter auter films che han scrit istorgia, sco «Ascenseur pour l'échafaud» dal reschissur Louis Malle. Cun quai crimi è Moreau vegnida enconuschenta il 1957.

Tschintg onns pli tard, cun la rolla sco dunna che charezza la libertad en l'istorgia da triangul, «Jules et Jim» da François Truffaut, ha Moreau lura pudì lantschar sia carriera internaziunala.

Intellect e passiun

Moreau è stada in giast regular tar festivals da film, tranter auter a Cannes ed a Berlin. Per sia ovra da la vita ha Moreau survegnì il 2000 a la Berlinale l'urs dad aur. Sco motiv è vegnì numnà ch'ella haja cumprovà en numerusas rollas sia abilitad da giugar cun rollas intellectualas e passiunadas.

Ella haja giugà tut il pussaivel. Sia abilitad da sa midar ha Joseph Losey, in da blers reschissurs ch'ella ha lavurà ensemen, numnà ina miracla.

Ella è ina dunna che vesa sa sezza davant numerus obstachels e che surmunta quels cun duvrar tut sias abilitads.
Autur: Joseph LoseyReschissur

L'emprima giada davant la camera è ella stada il 1948. Ella haja lavurà cun ils pli gronds da la branscha. Cun Jean-Paul Belmondo e Peter Brook en il film «Moderato cantabile» e dasper Marcello Mastroianni en «La notte» da Michelangelo Antonioni.

Palma d'aur per sia ovra da la vita

Er en Germania è l'actura franzosa stada dumandada. Rainer Werner Fassbinder ha dirigì il film «Querelle» cun ella e Wim Wenders il film «Jusqu'au bout du monde». L'onn 1976 ha Moreau debutà sco reschissura cun il film «Lumière», cun ina istorgia davart quatter amias. En Frantscha e Jeanne Moreau era stada enconuschenta sco chantadura.

Jau chal cura ch'jau sun morta.
Autur: Jeanne MoreauActura

Moreau ha survegnì blers premis durant sia vita. Tranter auter era la palma d'aur a Cannes per sia ovra da la vita l'onn 2004. Ina vita senza giugar n'ha ella betg pudì s'imaginar.

RR novitads 14:00