Siglir tar il cuntegn
Inhalt

Exteriur James Comey: «Quai èn stadas manzignas»

Il schef dal FBI relaschà, James Comey ha stuì dar pled e fatg davant ina cumissiun dal senat. Durant l'audiziun ha Comey accusà Trump da pliras chaussas. Tranter auter haja il president vulì persvader Comey da terminar las investigaziuns cunter Michael Flynn, l'anteriur cussegliader da segirezza.

Purtret da James Comey.
Legenda: James Comey ha gì da dar pled e fatg davant ina cumissiun dal senat. Keystone

La regenza da Trump ha argumentà la relaschada da Comey cun quai che l'FBI saja vegnì manà schlet. «Quai èn stadas manzegnas», ha ditg Comey durant l'audiziun la gievgia. El va da quai ora che l'affera cun la Russia saja stada il motiv principal per vegnir relaschà.

Comey ha plinavant rinforzà sia decleraziun che Trump haja empruvà da persvader el da terminar las investigaziuns cunter Michael Flynn, l'anteriur cussegliader da segirezza. Trump haja ditg ch'el speria che Comey vesia ina via da laschar crudar las investigaziuns cunter Flynn. Comey di ch'el haja chapì quai sco ordinaziun.

Plinavant ha Comey confermà ch'el haja da vinavant infurmaziuns davart quest discurs cun Trump a las medias. cun quai ha el vulì ch'in investigader spezial surpiglia las investigaziuns en l'affera davart la Russia.

Nagin dubi che la Russia haja influenzà las elecziuns

L'anteriur schef dal FBI ha nagins dubis che la Russia haja empruvà da far il hacken computers dad organisaziuns da la regenza. Quai hajan els fatg per pudair influenzar las elecziuns per il presidi american. Emprimas scuvertas haja quai dà gia la stad 2015.

Ils democrats rinfatschan a la regenza da Trump, ch'els hajan almain savì da las attatgas u ch'els sajan perfin stads involvids.

RR novitads 20:00