Siglir tar il cuntegn
Inhalt

Exteriur Italia - via libra per elecziuns novas

En l'Italia ha il president Sergio Mattarella schlià il parlament. Il cabinet dal primminister actual Paolo Gentiloni ha fixà ils 4 da mars sco termin per novas elecziuns. Fin lura vegn el a manar las fatschentas.

Il president da l'Italia Sergio Mattarella.
Legenda: Il president da l'Italia Sergio Mattarella. Keystone

Il president talian Sergio Mattarella a schlià il parlament. Uschia è la via libra per elecziuns l'onn proxim. Mattarella ha signà oz il decret necessari. Fin las elecziuns e fin ch'in nov cabinet è en uffizi vegn il primminister democratic Paolo Gentiloni a manar las fatschentas.

Suenter las elecziuns il mars ston Talianas e Talians dentant quintar che furmar ina nova regenza daventia ina chaussa spinusa. Las retschertgas actualas mussan, che nagina singula partida na vegn probablamain sin la maioritad necessaria. La pli ferma partida tenor las retschertgas è actualmain il moviment «Cinque Stelle» da Beppe Grillo, ch'è critic vers l'EU. Silsuenter suonda la partida regenta da l'anteriur primminister Matteo Renzi, il «Partito Democratico» (PD). E sin plaz trais è la partida «Forza Italia» da Silvio Berlusconi.

RR novitads 20:00