Siglir tar il cuntegn

Exteriur Italia proclamescha stadi d'urgenza suenter terratrembels

Fertant ch'il dumber da morts crescha sin 267 na vegn la terra en l’Italia Centrala betg a paus: il venderdi è vegnì registrà in terratrembel cun ina fermezza da 4,7. La regenza taliana a Roma ha entant proclamà il stadi d'urgenza ed annunzià in di da malencurada naziunala per la sonda.

Questa sonda duain tuttas bandieras vid bajetgs publics vegnir sbassadas a mesa asta. Uschia vul l’Italia sa regurdar vid las tschients unfrendas da la catastrofa natirala.

In pensum per il futur

La regenza da primminister Matteo Renzi ha empermess ina svelta reconstrucziun ed ina meglra prevenziun da terratrembels. «Nus avain l’obligaziun morala envers las dunnas ed ils umens da questas vischnancas», ha ditg Renzi suenter ina sesida da crisa la gievgia. «La reconstrucziun da quests vitgs è la prioritad da la regenza e dal pajais.»

Il cussegl dals ministers ha empermess daners d’agid en l’autezza da 50 milliuns euros. Er la prevenziun per terratrembels stoppia vegnir meglierada. «Quai sto esser noss pensum per il futur», uschia Renzi.

Terratrembel dal venderdi

Tenor l'observatori da terratrembels american è l'epicenter stà radund 5 kilometers en il nord-vest dal vitg dad Amatrice.

Quai è stà il terratrembel il pli ferm suenter il terratrembel fatal da 6,2 la notg da mardi sin mesemna.

Almain 267 unfrendas

Il terratrembel posteriur haja effectuà che ulteriurs bajetgs en il vitg dad Amatrice èn crudads ensemen. Quai rapporta l'agentura da novitads Ansa.

Entant ha la protecziun civila curregì ensi il dumber dals morts da 250 sin almain 267. Latiers datti 387 blessads. Tenor quellas cifras è la gronda part da las victimas - numnadamain 207 persunas - morta ad Amatrice.

Cunquai che vegnan supponidas anc adina persunas sut las ruinas pudess il dumber crescher vinavant.

RR novitads 08:00 +

Terratrembel dals 24-08-2016

  • Las 03:36 la notg squassa en la profunditad da 10 kilometers la terra da l’Italia Centrala cun ina fermezza da 6,2.
  • lls 4 lieus Amatrice, Accumoli, Pescara del Tronto ed Arquata del Tronto en l’Appenin èn pertutgads da las pli grondas devastaziuns.
  • La regiun da catastrofa en l’Appenin è muntagnarda. Quai engrevgescha l'agid e la communicaziun.