Siglir tar il cuntegn
cuntegn

Exteriur Italia: Matteo Renzi sa retira

Il primminister talian Matteo Renzi vul sa retrair suenter ch'ils Talians han refusà la refurma da la constituziun. Bun 59 pertschient dals votantas han ditg na a la refurma da la constituziun. Quai annunzia il ministeri da l'intern suenter avair dumbrà tut ils districts e las vuschs.

Purtret da Matteo Renzi.
Legenda: Terrada: Matteo Renzi vul oz suentermezdi inoltrar sia demissiun uffiziala. Keystone

Il primminister Matteo Renzi aveva concedì sia terrada gia suenter las emprimas prognosas ch'eran stadas cleras. Il suentermezdi vul el offrir sia demissiun tar il president dal stadi Sergio Mattarella, ha Renzi ditg a Roma. Il president dal stadi sto uss decider co cuntinuar. Pussaivel è d'installar ina regenza provisorica, da proclamar elecziuns novas l'onn che vegn u era da refusar la dumonda da sa retrair da Matteo Renzi.

Opposiziun pretenda novas elecziuns

Entant pretenda l’opposiziun en l'Italia novas elecziuns. Els sajan pronts da votar uschè spert sco pussaivel. E quai tuttina cun tge lescha electorala ha ditg Matteo Salvini, il schef da la partida 'Lega Nord'.

Per Beppe Grillo, il schef dal moviment talian 'Cinque Stelle' ch'è critic envers l'Europa, è il resultat dal referendum ina victoria per la democrazia. La partida populistica da Grillo pudess tenor retschertgas cuntanscher passa 30% ed uschia daventar la pli ferma partida.

RR novitads 06:00