Siglir tar il cuntegn
Inhalt

Exteriur Italia ha ina nova regenza

En l'Italia datti ina nova regenza suenter contractivas da pliras emnas. Il president Sergio Mattarella ha incumbensà il giurist Giuseppe Conte da furmar ina regenza, uschia ha communitgà in represchentant dal president. La saramentaziun è planisada per damaun venderdi suentermezdi a Roma.

purtret da Giuseppe Conte
Legenda: Giuseppe Conte vegn puspè, suenter ch'el ha dà enavos ses mandat vul el ussa furmar ina regenza. Keystone

Suenter datti ina votaziun da confidenza en il parlament. Conte vegn sustegnì da la partida populista Movimento Tschinque Stelle e da la dretga Lega. In'emprima emprova da Conte da far ina regenza ha fatg naufragi suenter che Mattarella n'ha betg acceptà Paolo Savona sco minister d'economia.

Conte - Cottarelli - Conte

Sinaquai ha Conte dà enavos ses mandat, e Mattarella ha surdà a Carlo Cottarelli l'incumbensa da furmar ina regenza. La Lega ed il Movimento Tschinque Stelle han lura empruvà ina segunda giada da far ina regenza ed han preschentà Giovanni Tria sco minister d'economia e da finanzas. Cun questa midada ha Cottarelli dà enavos da sia vart, e Sergio Mattarella ha surdà danovamain a Giuseppe Conte da furmar ina regenza.

Da furmar ina regenza ha durà bunamain trais mais. L'elecziun parlamentara è stada ils 4 da mars.

RR novitads 22:00