Siglir tar il cuntegn
Inhalt

Exteriur Italia: Furmaziun da la regenza ha fatg naufragi

Quai bun dus mais suenter las elecziuns dal parlament.

Sergio Mattarella, il president da l'Italia.
Legenda: Sergio Mattarella, il president da l'Italia ha communitgà a las medias glindesdi saira ch'ils discurs hajan fatg naufragi. Keystone

Il president, Sergio Matarella, ha proponì ina regenza neutrala. Quella duess reger fin la fin la l’onn. Matarella ha appellà tuts parsuras da las partidas da sustegnair quella schliaziun transitorica. Uschiglio dettia il pli tard l’atun novas elecziuns.

La partida da la dretga LEGA ed il moviment politic 5 Stelle han annunzià da betg acceptar ina regenza transitorica. Enstagl pretendan els elecziuns novas en l’Italia, che duain gia esser ils 8 da fanadur.

Nagina veglia da collavurar

Divers discurs durant las ultimas emnas avevan mussà ch'ils foss tranter las partidas èn fitg profunds e strusch da surmuntar. Plinavant n'è er la veglia da collavurar pli stretg betg qua. Ils socialdemocrats che han regì fin uss han gnanc cuntanschì 19%, ma na levan collavurar ni cun in ni cun l'auter victur da las elecziuns.

L'uniun da mez-dretg tar la quala er la partida da l'anteriur primminister Silvio Berlusconi, la Forza Italia tutga aveva cuntanschì 37% da las vuschs ed avessan er duvrà in partenari da regenza. Il moviment 5 Stelle era daventà il pli ferm cun 32% da las vuschs. Els han però pretendì che Silvio Berlusconi sortia da l'uniun mez-dretg avant che collavurar cun quella. Da quai na leva l'uniun dentant savair nagut.

RR novitads 06:00