En l’Italia vulan ils commembers e las commembras dal Movimento Cinque Stelle gievgia s’abstegnair d’ina votaziun da fidanza en il senat. Quai ha annunzià lur schef Giuseppe Conte mesemna saira.
Quella decisiun periclitescha l’entira coaliziun da regenza en l'Italia. En la regenza dal primminister Mario Draghi gioga il Movimento Cinque Stelle numnadamain ina rolla impurtanta. Gievgia discutescha il senat sur in pachet d’agid da pliras milliardas euros per famiglias ed interpresas. Quest pachet è cumbinà cun ina votaziun da fidanza.
La partida da l'anteriur primminister Giuseppe Conte na para betg dad esser cuntenta cun quest pachet da mesiras. La regenza stoppia far dapli per cumbatter ils problems socials che creschian adina pli fitg en l'Italia, uschia Conte. Bain sajan els pronts per il dialog, dentant na dettia betg in schec en blanco. La coaliziun da regenza dal primminister Mario Draghi è dapi il favrer 2021 en uffizi.
