Siglir tar il cuntegn
Inhalt

Exteriur Istanbul: «Die Welt»-correspundent vegn en arrest d’inquisiziun

In derschader ad Istanbul ha ordinà arrest d’inquisiziun per il correspundent da la gasetta tudestga «Die Welt» en Tirchia. En Germania èn regenza, partidas ed uniuns da schurnalists vilentadas.

Portrait.
Legenda: Deniz Yücel – il correspondent da «Die Welt» è en arrest d'inquisiziun en Tirchia (fotografia: Talkshow Maybrit Illner). Keystone

Il glindesdi era il schurnalist Deniz Yücel (43) vegnì en inquisiziun dad arrest suenter esser stà gia 13 dis en fermanza da la polizia. Tenor lescha tirca po quella furma dad arrest durar enfin tschintg onns.

La gasetta rapporta, che la procura publica renfatschia a Deniz Yücel da far propaganda terroristica e d’instigar la populaziun. La raschun sajan rapports davart e-mails dad in minister che sajan vegnids publics suenter in’attatga da hackers. Il correspundent ha tant il pass tudestg sco tirc.

Indignaziun e protests - las reacziuns en Germania

La chanceliera tudestga Angela Merkel ha crititgà l’arrestaziun da Yücel vehementamain. Ella ha ditg, che la regenza tudestga spetga, che la giustia tirca resguardia en ses tractament dal cas «l’auta valur da la libertad da la pressa per mintga societad democratica».

L’organisaziun Reporters senza cunfins pretenda che Yücel vegnia liberà immediatamain. Ses arrest signifitgia ina nova qualitad en persequitar schurnalists en Tirchia. A Berlin e Frankfurt èn planisads protests.

RR novitads 06:00