Il mir duaja impedir che Palestinais da Issawijeh possian bittar craps e buttiglias ardentas sin autos ch’en sin via tranter Jerusalem e Maale Adumim. Il ministeri da l'exteriur israelian discurra d'ina mesira da segirezza temporara e betg d'in pass politic.
Aut, lung e custus
Ils plans prevesan d'eriger in mir da 9 meters autezza ed d'ina lunghezza da 1,5 kilometers. Ils custs da construcziun per il mir muntan tenor calculaziuns a 4,6 milliuns euros.
Ulteriuras bloccadas èn planisadas
Er autras parts dal quartier duajan vegnir barricadadas. Là abiteschan radund 20’000 persunas. Ina bloccada sumeglianta saja era planisà tranter l’abitadi israelian Armon Hanaziv ed en ils quartiers arabs Dschabel Mukaber e Sur Baher.
John Kerry vul intermediar
Il minister da l'exteriur american, John Kerry, ha entant pretendì ina fin da la violenza en il conflict dal Proxim Orient. Il proxims dis vegnia el a s'inscuntrar per discurs, quai tant cun il primminister israelian, Benjamin Netanjahu, sco er cun il president dals Palestinais, Mahmud Abbas.
Dapi l'entschatta dal mais october èn vegnids mazzads tar attatgas 8 Israelians e passa 40 Palestinais.
RR novitads 10:00