Israel sa dosta cunter decisiun da l'ONU

Il Cussegl da segirezza da l’ONU pretenda cun ina resoluziun che l’Israel duai immediat chalar da construir abitadis en la Cisjordania en l’ost da Jerusalem. L’Israel da sia vart titulescha la decisiun sco infama ed anti-israeliana; ins na vegnia betg a respectar ella.

La politica da l'Israel da bajegiar abitadis en la Cisjordania.

Legenda da maletgs: Gia daditg in punct dispitaivel. La politica da l'Israel da bajegiar abitadis en la Cisjordania. Reuters

En ils egls da l’ONU èn illegals ils abitadis gidieus en la Cisjordania annectada da l'Israel. L'ONU titulescha ils abitadis israelians sco violaziun da dretg internaziunal e sco in dals impediments da pasch en il Proxim Orient.

Auter che fin uss han ils Stadis Unids desistì da lur dretg da veto ed èn s'abstegnids da la vusch. Ils 14 ulteriurs commembers dal Cussegl da segirezza han approvà la resoluziun. Tenor l'ambassadura americana da l'ONU Samantha Power cuntegna la resoluziun er passaschas che condemneschan la violenza da vart palestinaisa.

Israel refusa resoluziun

L’Israel ha refusà questa resoluziun dal Cussegl da segirezza da l’ONU. Ella saja infama ed anti-israeliana. Ins na vegnia betg a sa tegnair vid la resoluziun – ha laschà a savair il primminister da l’Israel, Benjamin Netanjahu.

Plinavant ha el instradà emprimas mesiras cunter ils stadis ch'eran per la resoluziun: El ha retratg ses ambassadurs da la Nova Zelanda e dal Senegal. Ultra da quai ha l’Israel franà tut ils programs d’agid per il Senegal.

La Nova Zelanda, la Malaisia, la Venezuela ed il Senegal avevan lantschà l’iniziativa en il Cussegl da segirezza da l’ONU.

RR novitads 06:00