Siglir tar il cuntegn
Inhalt

Exteriur Israel – in pajais segir ma cun tscherts no-gos

Benedetg Cajacob viva e lavura dapi stgars in onn e mez a Beer Scheva en l'Israel. El sa senta segir en ses mintgadi. Il conflict tranter l'Israel e la Palestina saja en tschertas situaziuns dentant palpabel.

Benedetg Cajacob sin il Munt dal Tempel ad Israel.
Legenda: Benedetg Cajacob sin il Munt dal Tempel ad Israel – in lieu da pelegrinadi impurtant per ils Muslims. MAD

En ses mintgadi senta Benedetg Cajacob, che lavura en l'Israel sco inschigner, strusch ina differenza cumpareglià cun la Svizra. El sa sentia segir ed insumma betg restrenschì en sia lavur ni en ses temp liber. El possia er ir en sortida enfin tard la notg senza avair tema. Uschia ch'il conflict tranter ils gidieus en l'Israel ed ils muslims en la Palestina saja strusch present.

Magari daventa il conflict palpabel

Dentant cun viver in temp en il pajais, tschintschar cun la glieud e far excursiuns sur ils cunfins d'Israel, ha Benedetg Cajacob resentì in zic l'odi che regia tranter l'Israel e la Palestina. Per exempel na possia el betg tematisar cun collegas da lavur israelians il conflict dal Proxim Orient ni auters temas religius ni politics. Quels sajan numnadamain da l'avis che l'Israel saja en il dretg e ch'ils Palestinais sajan ils nauschs. Er en Palestina nua ch'i dat era abitadis da Gidieus, dettia quai separaziuns strictas tranter las duas religiuns. Uschia datti quartiers, vitgs e vias mo per Gidieus ed auters mo per Muslims.

Adina puspè atmosfera tendida a Jerusalem

Era a Jerusalem datti adina puspè incidents tranter las religiuns. Questa stad hai adina puspè dà tumults ed era morts tar attatgas. Là numnadamain s'entaupan trais grondas religiuns – per ils Cristians, ils Muslims ed ils Gidieus è Jerusalem lieu da pelegrinadi. Però en tut las autras citads israelianas saja quai ruassaivel. Forsa schizunt pli ruassaivel ch'èn blers pajais da l'Europa, manegia Benedetg Cajacob.

RR actualitad 07:00