Siglir tar il cuntegn
Inhalt

Exteriur Israel: 3’000 abitaziuns novas en Cisjordania

Las autoritads hajan lubì infra dus dis provisoricamain la construcziun da passa 3’000 abitaziuns. Quai annunzia l'organisaziun Peace Now.

In abitadi gidieu.
Legenda: Har Homa è in dals abitadis gidieus ch’èn vegnids construids en il Sid da Jerusalem da l’Ost. Keystone

Ils plans da colonisaziun sa chattan en differentas fasas, scriva l’agentura da novitads svizra SDA. Els han adina er da survegnir in permis dal ministeri da defaisa. Las unitads d’abitar tutgan tar differents abitadis. Ina reacziun uffiziala da l'Israel sin ils rapports na datti betg.

600'000 colonists en Cisjordania e Jerusalem da l'ost

Ils davos onns ha l'Israel adina puspè schlargià vitgs gidieus existents cun bajegiar novas abitaziuns. Actualmain vivan passa 600’000 colonists en la Cisjordania occupada ed en il Jerusalem da l'ost annectà.

Abitadis gideus fan stagnar process da pasch

Ina part dals abitadis èn vegnids construids cun permis explicit da la regenza. Ils uschenumnads abitadis selvadis approvescha ella per gronda part. Tenor l’ONU èn dentant tut ils abitadis en ils territoris occupads dad Israel illegals.

Internaziunalmain valan ils abitadis gidieus sco obstachel pli grond per ina pasch persistenta. Els èn numnadamain fabrichads là, nua ch’ils Palestinais lessan drizzar en lur stadi independent da Palestina cun Jerusalem da l’ost sco chapitala.

RR novitads 12:00