Siglir tar il cuntegn

Header

cuntegn

Exteriur Islamabad: 83 persunas moran tar in’attatga terroristica

En ina da las pli grondas attatgas da terror en l’istorgia pakistana moran 83 persunas e 250 persunas vegnan blessadas grevamain.

L’attatga da suicidi è capitada en il sid dal Pakistan tar in sanctuari dals sufis. Ils sufis èn ina gruppa da muslims moderads ch’è pervi da lur tenuta adina puspè en mira da las gruppas sunnitic-islamisticas.

Tschients crettaivels eran sa radunads la gievgia saira per ils sauts tradiziunals en onur dad Allah, cura ch’il attatgader è sa siglientà amez la fulla. In pledader da l’associaziun caritativa Edhi haja ditg, che l’ala dal sanctuari, ch’è vegnida attatgada, saja stada l’ala da las dunnas. Perquai èn era almain 19 uffants tranter ils morts. Els eran là cun lur mammas.

Tenor in medi dad in ospital vischinant al sanctuari sajan vegnidas registradas 248 persunas blessadas. Cun radund 50 dad els na giaja quai insumma betg bain.

Curt suenter l’attatga è la milissa terroristica Stadi Islamic SI sa declerada responsabla per il attentat. Il schef da l’unitad anti-terroristica da la polizia ha ditg, ch’il attentader saja sa travestì sco dunna per pudair vegnir en il sanctuari.

La populaziun da Pakistan suffrescha dapi il 2007 da numerus grevs attentats. Sulet l’onn 2016 moran almain 297 persunas tar tschintg gronds attentats.

RR novitads 12:00+

Artitgels legids il pli savens