Siglir tar il cuntegn
cuntegn

Exteriur «Irma» è la pli privlusa da tut ils huricans

Anc mai n'haja in hurican furià cun ina tala fermezza sco quai che «Irma» fa quai actualmain en la Caribica. Là ha il hurican custà la vita ad almain diesch persunas. Sin sia ruta ha el devastà pliras inslas caribicas - uschia Barbuda, Antigua e Saint-Martin.

«Irma» saja il hurican pli ferm ch'è mai vegnì registrà en la regiun, rapporteschan las agenturas da novitads. El sa mova cun spertezzas maximalas da fin a 300 kilometers l'ura vers Haiti e Florida.

Tenor stimaziuns da las Naziuns Unidas pudessan ils proxims dis esser pertutgads fin 37 milliuns umans dals effects dal hurican.

Er sin l'insla caribica Barbuda ha «Irma» chaschunà gronds donns. Almain 95% dals bajetgs sajan donnegiads, per part destruids dal tut, ha ditg il primminister da Barbuda.

Ora sur la mar smanatscha gia nov privel: Sur l'Atlantic è en viadi «Jose», il proxim hurican. Cun il hurican «Katja» en il Golf da Mexico mussan las cartas actualmain trais huricans activs en la regiun:

La regiun gronda da Mexico fin ora en l'Atlantic cun trais huricans.
Legenda: Las cartas mussa ils lieus, nua ch'il trais huricans activs sa movan actualmain. Keystone

«Irma» cuntinua viadi vers Republica Dominicana e Bahamas

«Irma» procuria per grondas undas, ferma plievgia e vents burascus, ha communitgà il center naziunal da huricans dals Stadis Unids. Il hurican sa mova vinavant enavant en direcziun vest- nordvest.

El frunta sin la Republica Dominicana e pli tard prenda el curs sin las Bahamas.

RR novitads 06:00++

In stemprà – plirs nums

En l’Altlantic dal Nord ed en il nord-ost dal Pacific han num quest tip da stemprads «hurican». En l’Ocean Indian ed en il Pacific dal Sid vegnan els numnads «ciclons». En il nord-vest dal Pacific discurran ins da «taifuns».