Siglir tar il cuntegn

Header

cuntegn

Exteriur Iran signalisescha prontezza per discurs

Il president iranais Hassan Ruhani crititgescha la decisiun da l’Arabia Saudita da rumper las relaziuns diplomaticas.

Il medem mument ha Ruhani dentant signalisà che l’Iran saja pront da discurrer cun l’Arabia Saudita. Tractativas diplomaticas sajan la meglra opziun per sclerir differenzas, ha il president iranais ditg.

Il mund è preoccupà

L'escalaziun da las tensiuns tranter l'Iran e l'Arabia Saudita aveva alarmà las pussanzas mundialas. Dasper las grondas pussanzas mundialas han era la Tirchia e la Germania appellà, da terminar immediat la crisa cun meds diplomatics. Dasper las relaziuns diplomaticas vul l’Arabia Saudita para er rumper las relaziuns economicas cun l’Iran.

Tensiuns gia dapi ditg

Er la Svizra ha avertì da betg anc pegiurar las tensiuns confessiunalas en la regiun tranter ils Schiits ed ils Sunnits. Las tensiuns ch'existan gia daditg tranter la chasa roiala sunnita en l'Arabia Saudita e la direcziun schiita en l'Iran èn vegnidas marcantamain mendras dapi che l'Arabia Saudita ha executà 47 persunas, tranter quellas il prominent clerical schiit Nimr Al-Nimr.

L'Arabia Saudita defenda ses agir

L'Arabia Saudita da sia vart ha defendì las execuziuns da 47 persunas pervi da rinfatschas da terrorissem. Ils accusads hajan gì in fair process, nua che lur appartegnientscha religiusa n'haja betg giugà ina rolla. Ils blers executads n’eran betg da confessiun schiita mabain persunas arrestadas durant las acziuns da terror tranter ils onns 2003 e 2006. Ils responsabels da l'Arabia Saudita eran conscients che l'execuziun da Nimr al-Nimr vegnia a chaschunar malruaus en la regiun.

Stadis arabs retiran lur ambassadurs

Suenter che plirs stadis arabs han decidì dad interrumper lur relaziuns diplomaticas cun l'Iran ha er il Kuwait retratg ses ambassadur ord il pajais. Demonstrants avevan attatgà l'ambassada saudiaraba a Teheran. L'entschatta da l'emna avevan l'Arabia Saudita, il Bahrain ed il Sudan interrut las relaziuns diplomaticas cun l'Iran.

RR novitads 06:00/12:00

Artitgels legids il pli savens