Mossul è l'ultima citad iracaisa pli gronda che vegn anc controllada dal Stadi Islamic. Quai suenter che truppas da la regenza avevan stgatschà ils dschihadists ord las citads Ramadi, Falludscha e Tirkrit.
Dasper l'armada iracaisa èn er milissas schiitas e curdas participadas vid l'acziun. Sustegn survegnan ellas d'aviuns da cumbat da la coaliziun d'anti terror timunada dals Stadis Unids. Fin 4'000 schuldads, policists e cumbattants sa participeschan a las operaziuns cunter la milissa da terror.
I vegn quintà cun ferms cumbats. A Mossul ed en ils lieus vischinants en para da quai da 4'000 cumbattants dal Stadi Islamic.
Fin in milliun fugitivs
Pervi da l'offensiva quinta l'organisaziun d'agid da l'ONU, l'UNHCR cun fin in milliun fugitivs. Da quels pudessian 700'000 esser avisads sin agid umanitar, uschia in pledader.
Las consequenzas da l'operaziun pudessan esser massivas. En la citad che vegn controllada da la milissa da terror Stadi Islamic vivan probabel anc 1,5 milliuns persunas. L'installaziun da rutas da fugia per civilists stoppia avair la pli auta prioritad. Tenor ils Stadis Unids èsi da quintar che la reconquista da Mossul cuzzia emnas.
RR novitads 06:00