Siglir tar il cuntegn
Inhalt

Exteriur Irac: Mossul è deliberà dal SI

La regenza iracaisa ha communitgà la dumengia suentermezdi, che sias truppas hajan reconquistà la citad da Mossul cumplainamain da la milissa terroristica Stadi islamic SI. Il schef da la regenza, Haider al-Abadi, gratuleschia a l'armada per questa gronda victoria, ha communitgà il biro dad Abadi.

Intgins schuldats cun ina bandiera.
Legenda: Schuldada iracaisa suenter avair conquistà ina punt a Mossul (data: mars 2017). Keystone

Il schef da las forzas armadas e primminister Haider al-Abadi saja arrivà en la «citad liberada da Mossul» ed haja gratulà als «cumbattants eroics ed al pievel iracais per questa gronda victoria», communitgescha il biro dad Abadi.

Er l’incumbensà spezial dals Stadis Unids per il cumbat cunter il SI, Brett McGurk, discurra dad ina «victoria» da las forzas iracaisas a Mossul. Sin Twitter commentescha el la nova, ch’Abadi è arrivà a Mossul, cun ils pleds, ch’Abadi saja arrivà per «gratular a las forzas da segirezza ed als Iracais per lur victoria cunter il SI».

L'october passà avevan las truppas da la regenza cumenzà in'offensiva sin Mossul. La coaliziun internaziunala anti-IS ha sustegnì l'armada cun attatgas ord l'aria.

A Mossul era vegnì proclamà il califat dal SI

En in’offensiva fitg sperta aveva il SI conquistà il zercladur 2014 la citad da Mossul. L’acziun aveva pussibilità al SI da controllar vasts territoris en il nord ed en il ost da l’Irac, ma er en la Siria vischinanta. Da la moschea gronda Al Nouri aveva il schef dal SI Abu Bakr al-Baghdadi proclamà in califat islamic sut il giuf da la milissa terroristica.

RR novitads 15:00