Siglir tar il cuntegn
cuntegn

Exteriur Irac: Cumenzà da reconquistar vest da Mossul

En l’Irac ha cumenzà l’armada in'offensiva cunter il vest da la citad Mossul. Quai ha communitgà il primminister Haider al-Abadi.

L’assagl sin il vest da Mossul ha cumenzà.
Legenda: L’assagl sin il vest da Mossul ha cumenzà. Reuters

Questa part vegn anc adina controllada da la milissa terroristica 'Stadi Islamic'. Ella vala sco davos center dals terrorists. Il militar ha declerà ch'ils schuldads avanzan dal sid vers quest center. Plirs vitgs sajan gia vegnids conquistads. Tenor las Naziuns Unidas vivan là radund 800'000 civilists. L’aviatica militara aveva bittà giu fegls sgulants per avertir la populaziun e per appellar als terrorists da capitular. Al-Abadi ha ordinà l'armada da respectar durant ils cumbats ils dretgs umans.

Il mais passà aveva l’armada chatschà davent ils terrorists da l’ost da Mossul. La citad è stada dapi il 2014 sut controlla da la milissa.

ONU quinta cun fugia da massa

L’ONU fa quint cun ina fugia da massa da la part vest da la citad iracaisa da Mossul. Cun la nova offensiva haja cumenzà ina cursa cun il temp, ha ditg il post da coordinaziun per agid umanitar en l’Irac. Ins emprovia ussa da metter a disposiziun – al sid da Mossul - alloschis d’urgenza per famiglias stgatschadas. Ma l’ ONU saja gia ussa al limit. Fin ussa sajan gia fugids 200’000 persunas da Mossul. En tut l’Irac dovrian sis milliuns persunas agid.

RR actualitad 06:00++