La crisa politica en l’Irac è s’intensivada: Aderents dal spiritual schiit Muktada al-Sadr èn entrads en il parlament suenter ch'il parlament aveva refusà ina nova proposta per ina regenza da tecnocrats.
Gia avant eran plirs millis da demonstrants entrads en l’uschenumnada «zona verda» nua che sa chattan dasper il parlament er uffizis guvernamentals ed ambassadas. Quai rapporta l’agentura da novitads franzosa AFP.
Dapi mais datti en l’Irac conflicts pervi da refurmas politicas ch’il schef da la regenza Haidar al-Abadi aveva empermess – dentant adina puspè spustà.
Bumba en in auto datiers da la chapitala
Dad in’attatga da suicidi en l’Irac èn almain 25 persunas e passa 30 vegnidas blessadas. Ina bumba saja explodida en in auto sin in martgà datiers da la chapitala Bagdad. Quai han communitgà las autoritads localas.
La mira da l’attatga saja cunzunt stads pelegrins schiits ch’eran sia via ad in reliquiari impurtant. Responsabla per l’attatga è stada tenor atgnas indicaziuns l’organisaziun terroristica sunnita Stadi islamic.
RR novitads 21:00