Investigaziuns da la Fifa: Blatter e Co. han incassà 80 milliuns

Ina investigaziun interna da la Fifa mussa che l’anteriur president da la Fifa Sepp Blatter ed l’anteriur secretari general da la Fifa Jerome Valcke sco er l’anteriur schef da finanzas Markus Kattner han ils ultims 5 onns s'enritgì persunalmain per 79 milliuns francs.

Blatter e Valcke.

Legenda da maletgs: En s’enritgì cun blers milliuns francs da la Fifa: Blatter e Valcke. Keystone

Il scandal da la Fifa va en ina nova dimensiun. Tenor indicaziuns dal giurists da la Fifa duajan l’anteriur president Sepp Blatter sco era il relaschà secretari general Jerome Valcke ed il schef da finanzas relaschà da curt Martin Kattner s’enritgi massivamain. Ils giurists han numna sin basa da las investigaziuns internas per ils onns 2010 fin 2015 ina summa da sur 79 milliuns francs. Il bler sa tractia quai da pajaments da bonus, d’auzaments da taglia e autras donaziuns persunalas.

Sco la Fifa ha communitgà sajan ils documents gia vegnids surdads a la Procura publica federala ed a la giustia americana. Ils pajaments ed ils contracts sajan probabel cunter las leschas en Svizra, scriva la Fifa.

Perquisiziun da chasa tar la FIFA

La gievgia saira ha la polizia intercuri la sedia principala da la Fifa a Turitg. Quai ha la Procura publica federala conferma envers l’emissiun «10vor10» da SRF. Cunter il president da la Fifa Gianni Infantino na saja nagina inquisiziun averta, conferma la Procura publica federala.

Las investigaziuns duajan confermar ils resultats da las inquisiziuns da fin qua ed era cumplettar els, scriva la Procura publica federala. «Concret sajan datas electronicas e documents vegni confiscads, quels vegnian uss controllads sin lur relevanza.»

Tenor indicaziuns da la Procura publica federala sa drizzian las investigaziuns sulet cunter persunas che sajan gia vegnidas numnadas bli baud ni cunter nunenconuschent. Cunter il president Giani Infantino na saja nagina inquisiziun pendenta, ha communitgà la Procura federala.

Ma al president da la Fifa Gianni Infantino smanatscha ina suspensiun provisorica.

RR novitads 14:00+