Investigaziuns cunter 16 funcziunaris da la FIFA

La giustia dals Stadis Unids investighescha cunter 16 ulteriurs funcziunaris da la FIFA. Tranter quels er cunter il vicepresident da la Federaziun da ballape internaziunala Ricardo Teixeira. I va per daners da corrupziun d'ina autezza da milliuns francs.

Loretta Lynch ministra da giustia dals Stadis unids da l'America.

Legenda da maletgs: Loretta Lynch ministra da giustia americana fa urden cun la FIFA. Keystone

En il scandal da corrupziun da la FIFA ha il ministeri da giustia american prendì en mira ulteriurs 16 impurtants funcziunaris dal ballape.

In da quels è 'anteriur commember da l'executiva da la Federaziun internaziunala da ballape il Brasilian Ricardo Teixeira. Quai ha communitgà la ministra da giustia americana Loretta Lynch. Vinavant s'interesseschan ils Stadis Unids era per l'anteriur president dal Honduras Rafael Callejas. Quel ha manà suenter esser stà president la federaziun naziunala da ballape.

Ier aveva la Svizra gia arrestà a Turitg dus vicepresidents da la FIFA. Pertutgads eran Alfredo Hawit dal Honduras schef da la Federaziun da ballape nord- e centralamericana (Concaf) sco er Juan Angel Napout dal Paraguay parsura da la Federaziun da ballape sidamericana (Conmebol).

RR novitads 06:00