Siglir tar il cuntegn

Exteriur Industria d'autos sustegna tests da svapur cun carstgauns

En connex cun il scandal da svapurs n'haja betg be dà tests cun schimgias mabain era cun carstgauns. Quai resulta d'in rapport da l'associaziun EUGT, davart quel han rapportà las gasettas «Stuttgarter Zeitung» e «Süddeutsche Zeitung». Passa trais onns suenter il scandal cumparan anc adina detagls.

Purtret d'in sbuf.
Legenda: Cun svapurs nuschaivlas n'èn betg be schimgias vegnidas examinadas mabain era carstgauns. Keystone

Curt e concis

  • VW ha fatg tests da svapur a curt temp cun 25 persunas per in studi davart la nuschaivladad.
  • Er cun schimgias ha la EUGH fatg tests da svapur.
  • Finamira è stada d'attatgar in studi da la WHO che ha mussà che las svapurs da diesel pon chaschunar cancer.

«L'associaziun da perscrutaziun europeica per l'ambient e la sanadad en il sectur da transport» (EUGT) è vegnida fundada il 2007 dals concerns VW, Daimler e BMW. Il rapport mussia ch'in studi sur curt temp saja vegnì promovì. En quest studi han persunas saunas inhalà dioxid da nitrogen. Per quest studi sajan vegnidas examinadas 25 persunas a l'ospital da l'universitad ad Aachen. Quai suenter avair inhalà mintgamai sur pliras uras l'oxid da nitrogen en differentas concentraziuns.

Avant curt èn tals tests cun animals vegnids enconuschent e han procurà per gritta. Tar quests tests eran schimgias vegnidas exponidas a posta a las substanzas nuschaivlas l'onn 2014. Ils tests vid ils animals eran vegnids enconuschents entras las retschertgas dals Stadis Unids en connex cun il scandal da svapurs da VW.

Finamira dals test saja stà d'attatgar in studi da l'Organisaziun mundiala da la sanadad (WHO). Quel ha mussà il 2012 che las svapurs da diesel pon chaschunar cancer.

RR novitads 06:00