Cun tals messadis sur telefonin vegnan ils abitants a savair tge lieus ch'èn pertutgads dad evacuaziuns e sch'els ston fugir dals incendis. En il stadi da Victoria han gia l'emna passada 67'000 persunas stuì bandunar lur chasas. Oz venderdi datti tenor Andrew Crisp il manader da la protecziun da catastrofas trais cloms per evacuaziuns.
Las persunas duain plinavant guntgir lieus isolads e guauds. «Nus na pudain betg far pausa, nus stuain restar attents», ha el ditg. Victoria è sco il stadi vischin da New South Wales pertutgà fitg ferm dals incendis.
Puspè pli chaud e dapli vent
Dapi l'entschatta dals incendis l'october èn ars en l'Australia passa 10 milliuns hectaras, quai correspunda circa a la surfatscha da l'Insla da l'Irlanda u duas giadas e mez la surfatscha da la Svizra. Almain 26 persunas èn mortas. Actualmain procura ina nova unda da chalira cun fin 40 grads e ferms vents che la situaziun dals incendis da chagliom daventa anc pli precara. En las citads grondas sco Sydney, Melbourne e Canberra, èn entant millis da persunas idas sin via per pretender ina midada tar la politica dal clima australiana.
Ord l'archiv da SRF:
RTR novitads 11:00
