Siglir tar il cuntegn
Inhalt

Exteriur Incendi a Londra – almain 30 persunas èn mortas

Almain 30 persunas èn mortas en l’incendi dal Grenfell Tower a Londra. Quai ha communitgà la polizia da Londra il venderdi a mezdi. 12 baras han pudì vegnir recuperadas, ina persuna è morta en l'ospital. Bleras persunas èn sparidas dapi l’incendi e las autoritads teman dapli unfrendas.

La Queen Elisabeth II è en visita tar las unfrendas da la catastrofa da fieu a Londra.
Legenda: La Queen Elisabeth II è en visita tar las unfrendas da la catastrofa da fieu a Londra. Keystone

La retschertga vegnia a durar anc divers dis, communitgescha la scheffa dals pumpiers da Londra, Dany Cotton. La raschun per il fieu na saja anc adina betg enconuschenta. Las investigaziuns hajan cumenzà, i saja dentant anc massa adura per dir insatge.

Pumpiers tschertgan muschnas.
Legenda: Betg pli salvar, mo recuperar - la lezia da pumpiers e polizists tar il Grenfell Tower. Keystone

Sco temì crescha la cifra dad unfrendas ad almain 30

Almain 30 persunas èn mortas en l’incendi dal Grenfell Tower a Londra. Quai ha comunitgà la polizia da Londra il venderdi a mezdi. 12 baras han pudì vegnir recuperadas, ina persuna è morta en l'ospital. Ils auters morts restan en la ruina. Dapli n’ha la polizia, che maina las investigaziuns, betg ditg.

Sin la dumonda, sch’el quintia cun ina tschientina da morts, ha respundì il schef da la polizia da Londra Stuart Candy, ch’el «ristgia da sperar, che nus na cuntanschian betg ina cifra da trais posiziuns».

Actualmain èn anc 24 persunas blessadas en l'ospital, 12 dad ellas sa chattan en stadi critic.

Ina vista totala da la ruina naira.
Legenda: Il Grenfell Tower, da chasa da radund 400 fin 600 persunas, è ina ruina naira. Keystone

Lavurs per segirar la ruina cuntinuan

Tenor lur ultima communicaziun èn teams spezials dals pumpiers londervi da segirar la ruina uschè bain sco pussaivel per che las equippas possian ir vi da la retschertga detagliada da las singulas auzadas. Orvant tut vegni ad esser grev da segirar u cuntanscher las auzadas sisum, ha ditg la scheffa Dany Cotton.

Las autoritads temian da chattar cunzunt en las auzadas pli autas anc bleras unfrendas da l’incendi devastus.

Demonstraziun da solidaritad «Giustia per Grenfell!»

La chas’auta era ina chasa cun abitaziuns sozialas. La critica vi dal nausch stadi da segirezza, en il qual la chasa saja stada, vegn adina pli vehementa.

Per il venderdi suentermezdi han activists clamà ad ina demonstraziun tar il ministeri per communitads ch’è er responsabel per la fabrica d'abitaziuns. Passa 1’900 persunas han annunzià via la rait sociala Facebook da vulair sa participar a l'acziun da solidaritad «Justice for Grenfell!». A las autoritads vegn rinfatschà da betg avair controllà sufficaintamain il Grenfell Tower.

Pumpiers sin ina stgala dador ina ruina naira.
Legenda: L'access a la ruina dal Grenfell Tower è privlus e difficil. Keystone

Analisas ed investigaziuns

En ina curta visita sin il lieu aveva la primministra britannica Theresa May annunzia da vulair sclerir la tragedia a fund e dad instradar las mesiras necessarias.

Tenor la gasetta The Guardian da venderdi avantmezdi haja Scotland Yard avert in'investigaziun da la tragedia.

Il fieu ha devastà en la notg sin mesemna en il ost da Londra il sgrattaschiel Grenfell Tower – ina chasa da 24 plauns e 120 abitaziuns.

RR novitads 10:00