In terz da las firmas d'ieli sto far quint cun bancrut il 2016

Pervi da la crudada massiva dals pretschs per l'ieli ston in terz da las firmas en la branscha anc quest onn quintar cun in concurs. Quai resulta d'in studi da l'interpresa da cussegliaziun Deloitte.

Pumpas d'ieli.

Legenda da maletgs: Franar las pumpas d'ieli: Almain la Russia e l'Arabia Saudita han decis da far quest pass. Keystone

Da las 500 interpresas ch'èn vegnidas examinadas en l'entir mund èn radund 175 periclitadas da l'insolvenza. Tut en tut hajan quellas da sbatter cun debits da passa 150 milliardas dollars.

Grondas perditas

Ordvart stretg vegnia quai per surtut per ils explotaders d'ieli sez. Tar las interpresas da servetsch vesia quai ora meglier uschia il studi.

La crudada dals pretschs d’ieli ha ultimamain procurà per massivs deficits, uschia er tar BP. Bleras firmas han perquai annunzià da franar la producziun d’ieli e da sa retrair ord tscherts projects.

Arabia Saudita e Russia frainan producziun d’ieli

Ils dus producents d'ieli, l'Arabia Saudita e la Russia, vulan franar la quantitad da lur producziun pervi dals pretschs d'ieli che crodan. Uschia han decis ils ministers d'ieli dals dus pajais.

Concret duaja la quantitad vegnir stabilisada sin il nivel dal schaner. Cun questa cunvegna giajan er la Venezuela ed il Catar d'accord.

L'Arabia Saudita è il pli pussant commember dal cartel d'ieli OPEC, al qual er la Venezuela, il Catar e 10 ulteriurs pajas appartegnan.

RR novitads 12:00 / 14:00