Tenor emprimas indicaziuns è ina persuna morta e pliras vegnidas blessadas. Tenor infurmaziuns uffizialas na saja la situaziun actualmain anc betg survesaivla. Las forzas da salvament sajan al lieu. L’explosiun saja capitada en la staziun da gas a Baumgarten an der March, datiers dal cunfin cun la Slovachia. La raschun per l'explosiun saja probabel stà in disturbi tecnic - ha communitgà la polizia.
Il transit da gas en il sid ed il sidost da l'Austria è interrut. Quai pertutga plirs pajais. Tranter quels era l'Italia ch`è prest cumplettamain tagliada giu. Ins n'haja dentant betg da quintar cun stretgas en la furniziun da gas cun quai ch'ins sappia far diever da reservas, uschia il ministeri d'economia talian.
RR novitads 11:00