Cun la chanzun «On à que l'amour» e la fotografia da mintgin dals 130 mazzads ha la Frantscha commemorà oz a las unfrendas dals attentats da Paris avant duas emnas: quai entamez Paris en la curt dal Dom d’invalids cun millis envidads.
Tranter ils envidads eran las famiglias da las unfrendas ed ils survivents dals attentats. Ina ceremonia commuventanta amez Paris. Da mintgin da las 130 unfrendas è vegnì prelegì ses num e sia vegliadetgna. Ed i croda en egl che las bleras unfrendas èn tranter 20 e 40 onns.
In cumbat fin a la fin
Ses pled ha il president François Hollande cumenzà cun ils pleds. «Nus na vegnin mai ad emblidar ils 13 da november.»
«130 ris che nus na vegnin betg pli ad udir, 130 vuschs ch'èn per adina tschessadas», uschia Hollande. «Perquai ch'els eran la vita e la libertad èn els vegnids mazzads.» E François Hollande empermetta a las unfrendas, a lur famiglias, a l'entira Frantscha da vulair destruir quell'armada da fanatichers - il Stadi Islamic.
En quest cumbat fin la fin - che la Frantscha vegni a gudagnar - possian ins quintar cun il militar, la polizia, la giustia, il parlament - gea, sin mintga Franzos.
Unfrendas survegnan il status da schuldà
La ceremonia en il «Dom dals invalids» mussa, tge impurtanza che Hollande dat a quels attentats a Paris. Igl è in lieu simbolic, nua che Napoleon è vegnì sepulì. Igl è il lieu, nua cha la Frantscha onurescha persunas dal militar, dentant mai civilists – almain fin oz. Che las unfrendas da Paris survegnan il status da schuldà va a prà cun la guerra encunter il terror, en la quala la Grande Nation sa chatta dapi ils attentats.