Siglir tar il cuntegn

Exteriur Implant atomar en Belgia reactivà

Il reactur atomar «Doel 3» en la Belgia è vegnì reactivà. Tar in test da turbinas en la part betg nucleara aveva quai dà in problem cun la software la gievgia passada. Sinaquai era l’implant vegnì mess giu automaticamain, aveva communitgà il gestiunari.

L'implant da reacturs atomars a Doel en la Belgia.
Legenda: Adina puspè problems ha l'implant da reacturs atomars a Doel en la Belgia. Keystone

Dapi la dumengia a bun’ura è l’implant «Doel 3» puspè en funcziun. Cumplaina capacitad duai il reactur puspè cuntanscher en il decurs dal di, rapporta l’agentura da novitads Belga.

Il lieu Doel sa chatta radund 150 kilometers dal cunfin beltg-tudestg. La Germania pretenda che la Belgia deactiveschia l’implant, perquai ch’il recipient da pressiun dal reactur ha millis pitschnas fessas.

Medemamain pertutgà da quests problems è il reactur «Tihange 2» che sa chatta 70 kilometers davent d’Aachen. L’autoritad da surveglianza atomara beltga ha però classifitgà ils reacturs sco segir, ina deactivaziun na saja betg necessaria.

RR novitads 11:00