Siglir tar il cuntegn

Exteriur Ils Stadis Unids èn preschents tar l'inscunter da segirtad

Il president american Donald Trump tramettia ses dus pli impurtants cussegliaders militars a la conferenza da segirtad a Minca, han ils organisaturs communitgà. Er las regiuns da crisa vegnan quest'onn ad esser represchentadas bain.

James Mattis.
Legenda: Minister da defensiun James Mattis vegn ad esser in dals represchentants americans. Keystone

A la conferenza da segirtad a Minca vegnan er ils Stadis Unids ad esser represchentads: Donald Trump trametta ses dus cussegliaders militars ils pli auts vers la Germania. Numnadamain il minister da defensiun James Marris ed il cussegliader da segirtad Herbert Raymond McMaster. En il center da l'inscunter stat il conflict en la Siria ed ulteriuras crisas en l'Orient Proxim e l'orient damez.

Sche la chanceliera tudestga Angela Merkel vegn ad esser preschenta a la conferenza da segirtad che cumenza ils 16 da favrer na san ils organisaturs anc betg.

Regiun da crisa bain represchentada

Tenor ils organisaturs vegnia quest onn er la regiun da crisa ad esser represchentada nunusitadamain bain a la conferenza da segirtad. Il president dal ministeri da l'Israel Benjamin Netanjahu, represchentants dals Palestinais e da l'opposiziun siriana vegnan spetgads. La Tirchia vegn ad esser represchentada dal president dal ministeri Binali Yildirim e dal minister da l'exteriur Mevlüt Cavusoglu. E per la Russia ch'è involvida en conflicts cun l'Ucraina e la Siria èn il minister da l'exteriur Sergej Lawrow ed il diplomat Sergej Kisljak s'annunziads.

RR novitads 14:00