- Ils Stadis Unids viseschan la cunvegna da clima da Paris.
- Trump empermetta ch'il pajais vegnia tuttina ad esser la naziun la pli schubra.
- La cuminanza mundiala è schoccada.
- Per l'Europa è cler: la cunvegna na vegn betg negoziada da nov.
Ils Stadis Unids bandunan la cunvegna da clima da Paris. Quai ha communitgà il president american Donald Trump a Washington. Ils custs per las mesiras da protecziun dal clima sajan per il pievel american memia auts, ha el ditg. El emprovia ussa da negoziar in meglier contract per ses pajais. La cunvegna da Paris saja fitg malgista per ils Stadis Unids, ha Trump ditg vinavant. Er malgrà la retratga vegnian ils Stadis Unids a restar la naziun la pli schubra.
Gia durant il cumbat electoral in tema
En ses cumbat electoral aveva Trump empermess da bandunar la cunvegna da clima. La sortida da la cunvegna na vegn però betg ad esser subit effectiva ma il pli baud il november dal 2020.
Tenor Trump sajan ils Stadis Unids dischavantagiads cumpareglià cun pajas sco la China e l’India che vegnan ad emetter anc per pli ditg gas dad effect da serra.
Stadis Unids tar ils pajais cun las pli grondas emissiuns
Suenter la China han ils Stadis Unids las pli grondas emissiuns da gas dad effect da serra. Quels èn en emprima lingia responsabels per la midada dal clima. Sper ils Stadis Unids èn la Siria e la Nicaragua ils sulets pajais – che na fan betg pli part da la cunvegna da clima da Paris.
La finamira da la cunvegna è da franar il stgaudament climatic ils proxims decennis. Ils Stadis Unids stuessan, tenor la cunvegna da Paris, reducir lur emissiuns per in quart fin l’onn 2025. Quai cumpareglià cun il livel dal 2005.
«Quai na vegn betg en dumonda»
Negoziar da nov la cunvegna dal clima da Paris na vegn betg en dumonda per la chanceliera tudestga Angela Merkel, per il president franzos Emmanuel Macron e per il primminister talian Paolo Gentiloni. Quai han communitgà communablamain ils trais politichers.
Make our planet great again. Thank you.
La presidenta da la Confederaziun Doris Leuthard deplorescha la decisiun dal president american. Sco segund grond chaschunader dals gas cun effect da serra nuschaivels hajan ils Stadis Unids ina responsabladad globala. La Svizra sustegnia vinavant la cunvegna da Paris.
RR novitads 22:00