Ils purs sa ravgentan dad ina refurma da rentas ed impostas planisada da la regenza sanestra da primminister Alexis Tsipras. Purs da Creta han perquai empruvà dad occupar il ministeri da l’agricultura.
Els han tratg crappa e tomatas sin policists. En pli han els bittà fieus artifizials envidads e rut fanestras dal ministeri, sco che la televisiun grecca ha mussà.
La polizia ha respundì cun gas lacrimogen.
Purs blocheschan bleras vias impurtantas
Planisà èsi da far ina demonstraziun anc pli gronda cun tractors davant il parlament ad Athen. Per evitar in caos da traffic blocca la polizia ina dunsaina da vias impurtantas per arrivar en il center.
Ils purs blocheschan gia dapi plirs dis almain 130 vias impurtantas en l'entir pajais. Els laschan passar la glieud mo en cas d’urgenza. Tut ils auters han da far per part gronds viadis per sviar las bloccadas.
RR novitads 12:00