Il termin per votar davart il referendum da «Brexit» è fixà

A l'inscunter da l'UE a Brüssel èn ils schefs da regenza ed ils presidents dals stadis commembers sa cunvegnids il venderdi saira sin refurmas. Quellas duain impedir che la Gronda Britannia bandunia l'Uniun europeica, l’uschè numnà «Brexit».

David Cameron (segund da sanester) ed il president da la cumissiun da l’UE Jean-Claude Juncker (segund da dretg).

Legenda da maletgs: Las tractativas a Brüssel han durà betg main che 18 uras il venderdi. Keystone

Tard la saira han il president dal cussegl da l’UE Donald Tusk ed il schef da la cumissiun da l’UE Jean-Claude Juncker preschentà in cumpromiss. La decisiun saja stada senza cuntravusch, ha communitgà Tusk. Uschia ha la Gronda Britannia acceptà questa proposta da cumpromiss.

Cameron cleramain cunter «Brexit»

Suenter la cunvegna ha il primminister brit David Cameron annunzià, ch'el vegnia a s'engaschar cun tut ses cor e cun tut si'olma per che ses pajais restia en l'UE. La cunvegna dettia in status spezial a ses pajais. Cameron ha fixà il termin per il referendum dal «Brexit» sin ils 23 da zercladur.

Tge che la Gronda Britannia dastga

La cunvegna prevesa tranter auter, che la Gronda Britannia po scursanir las prestaziuns socialas per burgais dad ulteriurs stadis da l’UE per maximalmain 4 onns. Quest uschè numnà «frain d’urgenza» dastga la Gronda Britannia activar davent dal referendum per 7 onns.
E vinavant po il pajais scursanir a burgais immigrads da l'UE il sustegn per uffants che na vivan betg en il pajais. Davent dal 2020 dastgan ulteriurs pajais da l’UE surpigliar questa regla.

RR novitads 06:00