Il schef da propaganda da l'SI saja mort

Il ministeri da la defensiun american è segir ch'il schef da propaganda da la milissa terroristica Stadi islamic è mort. L'attatga or da l'aria cunter Abu Mohammed al-Adnani dals 30 d'avust haja accumplì ses scopo, ha communitgà in pledader dal ministeri.

Il pentagon in bajetg cun 5 chantuns.

Legenda da maletgs: Il ministeri da defensiu en il pentagon a Washington DC. Keystone

L'SI aveva communitgà la mort da al-Adnani gia il di da l'attatga. Ils Stadis Unids avevan era confermà d'avair attatgà Al-Adnani, n'avevan però lura anc betg pronuzià la mort da lez.

Al-Adnani era in dals fundaturs da l'organisaziun da l'SI. Suenter la conquista da gronds territoris en Siria e l'Irak aveva el proclamà en in messadi il 'califat' da l'SI.

Al-Adnani era il pledader da l'SI e cun quai la vusch da l'organisaziun terroristica. El appellava als partisans da la milissa terroristica SI da far attatgas. Tenor servetschs secrets da l'Europa era el involvà en la planisaziun da divers attentats – tranter auter era quels da Paris, Brüssel ed al port aviatic d'Istanbul. Ils Stadis Unids da l'America avevan empermess ina premia da tschintg milliuns dollars per l'arrestaziun da Al-Adnani.

RR novitads 09:00