Siglir tar il cuntegn

Header

cuntegn

Exteriur Il rocker à la française ha stuì bandunar la tribuna

Johnny Hallyday ha emplenì entirs stadis. El è stà ina icona da la musica franzosa ed ha vivì sco fugitiv fiscal en Svizra. La mesemna notg ha l'um da 74 onns stuì bandunar la tribuna.

En sia carriera musicala ha il musicist cun la vusch da sgrattirola gudagnà tantas plattas dad aur ed argient sco paucs da ses cumpatriots. El ha laschà enavos pli che 100 milliuns portatuns cun verms musicals sco «Oh, ma jolie Sarah» u «Ma gueule».

Ils onns 60 ha Hallyday purtà il rock'n'roll en Frantscha. El ha dentant interpretà el a sia moda e manera e suttamess el al country, hip-hop e tecno en il decurs da la sia carriera.

Pli pauc aur ed argient en il passà

Il chantadur cun num burgais Jean-Philippe Smet è naschì sco figl d'in actur, ballarin e chantadur beltg a Paris. Il bab ha dentant bandunà la famiglia en l'uffanza da l'icona da rock'n'roll. La mamma lavurava ed uschia è Johnny, sco ch'el vegn numnà da ses fans, creschì si tar sia sora. E gia cun in onn è l'uffant ì sin turnea cun la sora ch'era ballarina.

Dasper success musicals è il chantadur era stà en las medias pervia da drogas, alcohol, fugia fiscala, plirs divorzis e la renfatscha da violaziun. A sia popularitad n'ha quai dentant mai fatg donn. Cuntrari, il musicist represchentava il siemi da libertad e dal grond success per in pitschen um.

Mort è il pitschen um cun grond success vi da cancer, sco sia dunna ha rapportà a l'agentura da medias AFP.

Jau scriv quests pleds senza da crair els.
Autur: Leaticia Smet Dunna dal chantadur

RR novitads 06:00

Artitgels legids il pli savens