Siglir tar il cuntegn

Exteriur Il privel ch’armas atomaras vegnan en mauns fallads

A la fin da l'inscunter davart la segirezza atomara a Washington averteschan ils pajais participants dal privel creschent, ch'armas atomaras pudessan vegnir en ils mauns d'extremists.

Il president american Obama discurra.
Legenda: Il president american Obama ha clamà a l’inscunter davart la segirezza atomara. Keystone

I dovria dapli stentas per evitar che persunas u gruppas betg legitimadas vegnian vid material atomar u sin ina moda radioactiv, hai num èn la decleranza finala.

Obama appellescha a la Russia

A la conferenza da medias finala a il president american Barack Obama ditg, ch'el reduciss gugent anc pli ferm l'arsenal american d'armas atomaras. Ed el ha appellà a la Russia, da puspè reprender las tractativas cuminaivlas. Quella n’era betg suandà a l’invit per l’inscunter. A l'ur da l'inscunter èn ils Stadis Unids e la China sa cunvegnids, da collavurar en il futur pli stretg en dumondas da la segirezza nucleara.

La Svizra sco bun exempel

A l'inscunter davart la segirezza nucleara a Washington è era il president da la Confederaziun Johann Schneider-Ammann sa participà. El ha pretendi il discharmament nuclear, e da reducir il material atomar ch'è avant maun sin l'entir mund. Pajais che possedian material radioactiv ferm concentrà stoppian magasinar quel en in lieu central. La Svizra saja in bun exempel, dacurt haja ella transportà radund 20 kilos plutonium e 2 kilos uran ferm concentrà en ils Stadis Unids, ha Schneider-Ammann ditg tenor l'agentura da novitads sda.

RR Novitads 07:00