Il parlament egipziun è puspè sa radunà

En l'Egipta è il parlament sa radunà per l'emprima giada dapi 3 onns e mez.

parlament

Legenda da maletgs: 596 deputadas e deputads egipzians èn puspè sa radunads ad ina sessiun. Keystone

Ina maioritad dals var 600 deputads sustegna il reschim autoritar da Abdel Fattah al-Sisi. Quel è dapi 1 onn e mez president da l'Egipta. El regia il pajais cun agid da decrets. Tenor la constituziun stuess il parlament uss approvar posteriuramain quests decrets.

Il davos parlament ch'era dominà d'islamists era vegnì schlià il 2012, suenter ch'ina dretgira aveva declerà sco nun-valaivlas las elecziuns. Il 2013 ha il militar destituì l'emprim president elegì democratic, Mohammed Mursi, suenter protestas e demonstraziuns massivas cunter Mursi. Dapi lura aveva l'anteriur schef da l'armada al-Sisi regì l'Egipta.

RR novitads 17:00