Siglir tar il cuntegn
Inhalt

Exteriur Il nov Asterix «Der Papyrus des Cäsar»

La retscha da comics la pli renumada da la Frantscha ha in nov tom. "Der Papyrus des Cäsar" sa numna la nova aventura da Asterix.

In cudesch da comic d'Asterix ord vista da sura.
Legenda: Il nov comic d'Asterix cun il titel «Der Papyrus des Cäsar». Keystone

Tar il papirus sa tracti dad in document secret. In chapitel ord las memoiras da Julius Cäsar, che descriva tut las terradas ch'ils romans han stuì tragutter cunter Asterix ed Obelix. Cäsar na less betg ch'insatgi legia quai chapitel. In dals scripturs lascha dentant svanir la rolla da papirus, e quai gist en ils mauns da Polemix, il journalist. Padrin da la figura Polemix e stà nagin auter che Julian Assange, whistleblower ed inventader da wikileaks, la plattfurma da scuvertas en l'internet. Cun la spariziun da la rolla cumenzan las dispitas sur da la pussanza dad informaziuns e communicaziun, tar Asterix funcziuna la communicaziun dentant oravant tut anc cun columbas da posta.

Gia il 36avel tom en la retscha d'aventuras d'Asterix

Il nov comic da Asterix è il 36avel da la retscha, ed il segund senza ils "babs" originals Albert Uderzo e Réné Goscinny. Uderzo ha dentant 88 onns, Goschinny è gia morts l'onn 1977. Albert Uderzo ha dentant decidì cun sia figlia, che l’Asterix duai er vinavant cumparair. Ils dus novs auturs èn Jean-Yves Ferri per il text e Didier Conrad per ils dissegns. Sco l'expert d’Asterix e autur dal lexicon d’Asterix Hors Berner di, n’hajan ils comics dentant betg pers qualitad cun ils novs auturs.