Siglir tar il cuntegn
Inhalt

Exteriur Il ministeri da finanzas american crititga la SNB

Perquai figurescha la Svizra vinavant sin la glista d’observaziun americana per stadis che manipuleschan lur valuta.

La fatschada durant la notg.
Legenda: La Banca naziunala svizra SNB al Bürkliplatz a Turitg. Keystone

En in rapport crititgescha il ministeri da finanzas american las intervenziuns da la Banca naziunala svizra SNB per flaivlentar il franc. Ils Stadis Unids pretendan da far transparentas questas intervenziuns als martgads da devisas. En pli duai la Svizra reducir sias intervenziuns mo a quels muments da crisa acuta, nua ch’il curs dal franc va ensi fermamain.

La SNB duai intervegnir via tschains e no en cas acuts via cumpras

Enstagl dad intervegnir possia la Svizra er duvrar instruments tradiziunals da la politica da finanzas sco ils tschains per manevrar l’inflaziun, cusseglia il rapport vinavant. Ils tschains èn Svizra èn actualmain tar minus 0,75% e tutgan tar ils tschains ils pli bass en tut il mund.

SNB refusa rinfatschas americanas

La Banca naziunala ha gia refusà las rinfatschas americanas e giustifitgà las intervenziuns en autezza da pliras milliardas sco remedi per sustegnair ils exports svizzers.

Sche nus intervegnin, na faschain nus quai betg per crear in avantatg a la Svizra tras ina valuta sutvalitada.
Autur: Thomas JordanPresident SNB

Dasper la Svizra èn er la Germania, la China, il Taiwan ed il Giapun sin questa glista. Nagin da quests pajais accumpleschan dentant actualmain tut ils criteris americans per valair sco manipulader da devisas.