4, 8, 19, 27, 34 e cifra supplementara 10
Las trais lottarias cun las dretgas cifras èn vegnidas cumpradas en ils trais stadis Florida, California e Tennessee. Uschia ston trais victurs parter il gudogn, vul dir: 500 milliuns per mintgin.
Da trair giu èn anc las taxas. En ils Stadis Unids san quellas variar tut tenor stadi. Era decisiv è ,sch’ins è American u betg. Esters han da pajar 5% dapli taxa. En media san ins dentant far quint, che 40% dal gudogn van al stadi. Uschia restan anc radund 300 milliuns dollars per mintga victur. Quels raps vegnan normalmain pajads ora en ratas durant 30 onns. Enstagl dals 10 milliuns mintg’onn san ins dentant era laschar pajar ora tut en ina giada. Lura na survegn ins dentant betg uschè bler. En quest cas bun 200 milliuns.
Gia avant in onn trais victurs
Gia il favrer avant in onn hai dà trais victurs en la medema runda. Lezza giada era dentant mo in terz da questa giada en il jackpot, vul dir: ina mesa milliarda. La rund’actuala vegniva giugada dapi ils 5 da november 2015. Adina mesemna e sonda vegn giugà ina runda. Ina lottaria per il «Powerball» custa dus dollars.
Quasi pussibilitads infinitas cun 1,5 milliardas dollars
- fabritgar 5 novs tunnels da viafier a l’Alvra
- realisar 5 turs a Vals tenor la visiun da Remo Stoffel
- pajar tut la paja dals giugaders da ballape da la prima e segunda Bundesliga
- realisar tut l’infrastructura ch’i vess duvrà per ils gieus olimpics 2022 en Grischun
- pajar a l’entira Svizra il quint da la Billag
Nov puspè 40 milliuns en il jackpot
Cunquai ch’il jackpot è vegni svidà, cumenza tut puspè da nov. En il jackpot èn da novamain 40 milliuns. L’emprima runda ha lieu la sonda, ils 13 da schaner. Ils participants han da tscherner 5 cifras tranter 1 e 69 plus ina cifra supplementara tranter 1 e 26. Quai sistem procura, ch’igl è zunt difficil da gudagnar. Uschia è la schanza da tscherner exact la gista cumbinaziun da cifras tar 1:292’000’000 (1:292 milliuns). Quai nov sistem da l’october 2015 è era il motiv ch’i dat uschè auts jackpots.