Siglir tar il cuntegn
cuntegn

Exteriur Il CEO da VW na sa retira betg

Martin Winterkorn, il schef dal concern Volkswagen, na sa retira betg. Publicamain ha el rugà per perdun. En in video ha Winterkorn empermess da vulair sclerir la chaussa spert e transparentamain. Las irregularitads tar ils motors da diesel cuntrafetschian a tut che VW veglia, ha ditg Winterkorn.

Martin Winterkorn, il schef da VW
Legenda: Martin Winterkorn, il schef da VW, deplorescha ils schabetgs. Keystone
Il mument n'hai jau betg las rispostas sin tut questas dumondas.
Autur: Martin WinterkornCEO da VW

L'um da 68 onns ha accentuà ch'el stettia mal ch'els hajan trumpà la fidanza. El s'exculpeschia per il cumportament sbaglià en tutta furma tar tut ils clients, tar las autoritads e tar la publicitad. El na veglia era betg sa retrair. I fiss fauss da suspectar en general la lavur dira e sincera da 600'000 persunas sulet pervi dals grevs sbagls da singuls ha ditg Winterkorn.

Svizra betg pertutgada

Schebain er la Svizra è pertutgada dal scandal n'è per il mument anc betg enconuschent. Tenor l'uffizi federal da vias ASTRA na dettia quai il mument anc nagins indizis che er models da VW en Svizra sajan pertutgads da l'affera da svapur. La situaziun vegnia però analisada precisamain e l'uffizi stettia en stretg contact cun las autoritads da l'exteriur communitgescha l'ASTRA. Tar l'immatriculaziun da novs autos sa basa la Svizra sin las directivas da l'Uniun Europeica.

RR novitads 17:00