Siglir tar il cuntegn

Header

Navigaziun

La chasa da represchentants da la regenza columbiana.
Legenda: La chasa da represchentants da la regenza columbiana. Keystone
cuntegn

Exteriur I savura da pasch en la Columbia

Suenter il senat ha er il congress ditg gea a la cunvegna da pasch tranter la regenza ed ils rebels da la FARC.

Uss ha pia il parlament approvà la cunvegna da pasch. 130 delegads han ditg gea ed i n'ha dà naginas cuntravuschs. Ils adversaris da la cunvegna n'han er betg prendì part a la votaziun. Gia il senat aveva vuschà cun 75 cunter 0 vuschs per questa cunvegna.

Dar giu las armas

Anc quest onn duain ils 5'800 cumbattants da la FARC cumenzar a dar giu lur armas. Millis da schuldads da las chapellinas blauas e dal militar vegnan a controllar quest process. Il contract da pasch va en vigur suenter in conflict da 50 onns. Ina votaziun dal pievel na datti questa giada betg pli. L'october era l'emprim contract da pasch vegnì refusà stgarsamain da la populaziun columbiana.

Curunaziun da la carriera da Santos

Il president columbian Juan Manuel Santos è satisfatg. Sias premuras da far pasch en ses pajais han purtà fritg. Santos era vegnì onurà gia avant quest success cun il premi Nobel per la pasch.

RR novitads 6:00