Siglir tar il cuntegn
cuntegn

Exteriur «I na dat nagina glista naira»

Plirs schurnalists n’han betg dastgà entrar en la Tirchia las ultimas emnas. La regenza ad Ankara sa dosta cunter il suspect ch’ella mainia ina «glista naira» cun reporters betg giavischads. La Tirchia dementescha la renfatscha.

Ina tastatura d'in laptop che targlischa en il stgir.
Legenda: La Tirchia maina tenor atgnas indicaziuns nagina glista naira cun nums da schurnalists da l'exteriur betg giavischads. Pixabay

Sche reporters vegnian impedids d'entrar en il pajais n'haja quai da far nagut cun lur opiniun u reportaschas, ha ditg in represchentant da la regenza trica envers l'agentura da novitads tudestga DPA.

En ils cas da scumond d’entrar en la Tirchia sajan intgins schurnalists sa cumportads a moda suspectusa.

Els hajan cuntrafatg al dretg tirc cun passar illegalmain ils cunfins per ir en la Siria. Auters plinavant sajan entrads en la Tirchia sco turists, senza s’accreditar tar la regenza.

Ordavant aveva il schef dal parlament da l'UE Martin Schulz avertì la Tirchia d'ina tala glista. Quella n'haja pers nagut en ina democrazia. Ils ultims dis era quai vegnì refusà a dus schurnalists tudestgs d'entrar en la Tirchia

Sin dumonda dals Verds sa fatschenta il Bundestag a Berlin la mesemna cun la situaziun da la libertad da pressa ed opiniun en la Tirchia.

RR novitads 06:00