Hotel da luxus en flomma

Curt avant che las festivitads da Silvester han cumenzà a Dubai, è rut ora in fieu en il center da la metropola al Golf. In hotel da luxus da 63 etaschas è en flommas. Tenor la polizia sa chatta l'hotel mo pauc davent dal pli aut sgrattaneblas dal mund, il Burj Khalifa.

sgrattatschiel che brischa a Dubai.

Legenda da maletgs: L'hotel da luxus sa chtta pauc davent dal Burj Khalifa. Keystone

Il hotel da luxus «The Address» ha 63 auzadas e sa chatta en il center da Dubai. Tenor la polizia èn evacuads tut ils giasts da hotel. 13 persunas sajan vegnidas blessadas lev ed ina haja survegnì in'attatga dal cor, quai ha communitgà la regenza. Autras funtaunas rapportan da 16 blessads, da quests 14 levblessads.

hotel da 63 auzadas stat en flommas

Legenda da maletgs: Il hotel stat en flommas. Keystone

En la vischinanza èn numerusas persunas sa radunadas per festivar la midada da l'onn. Las 21:00 temp europeic ha cumenzà il grond fieu artifizial enturn il Burj Khalifa sco planisà.

Sin fotografias dal bajetg che brischa è stà da vesair che las flommas tanschevan da las auzadas bassas fin lunsch siador. Fim nair era s'extendì sur la citad.

Ils pumpiers hajan entant sut controlla las flommas en il hotel da luxus, scrivan las agenturas da novitads. Il brischament saja stizzà. Pertge ch'i ha piglià fieu na san ins anc betg.

RR novitads 20.00