Siglir tar il cuntegn

Header

cuntegn

Exteriur Hollande e Putin s'avischinan en coaliziun d'anti-terror

La Russia e la Frantscha vulan collavurar pli stretg per cumbatter la milissa terroristica Stadi Islamic ed er barattar pli savens infurmaziuns. Quai ha declerà il schef dal Kremlin Putin suenter in inscunter cun il president da la Frantscha Hollande.

Frantscha sa regorda

Avrir la box Serrar la box

La Frantscha commemorescha oz las unfrendas da las attatgas terroristicas. Passa 1'000 giasts vegnan spetgads a la ceremonia en il dom dals invalids, tranter quests numerus parents da las 130 unfrendas.

La ceremonia ha cumenzà cun preleger ils nums da tuttas unfrendas.

Ils dus pajais vulan communablamain ir suenter fastizs e chastiar ils terrorists ch'èn responsabels per las ultimas attatgas sin lur pajais, ha ditg Putin.

Naginas attatgas sin rebels sirians

Putin ha menziunà ch'ins saja sa cunvegnì d'impedir en la Siria attatgas sin gruppaziuns che cumbattan er cunter il terror.

Fin uss taxava la Russia tuts adversaris dal president sirian Baschar al-Assad sco terrorists. Putin ha declerà ch’il cumbat cunter il SI saja be da gudagnar cun truppas a terra. Per quai intent sajan Assad e sia armada «ils alliads natirals».

Barattar infurmaziuns

Hollande e Putin èn sa cunvegnids da collavurar cunter il terror cunzunt entras barattar infurmaziuns. Quest’emna è Hollande sa coordinà cun ils Stadis Unids, la Gronda Britannia, la Germania e l’Italia per organisar il cumbat cunter il IS. E Putin è pront per collavurar cun ils Stadis Unids, communitgeschan agenturas russas.

Hollande e Putin dattan il maun: Dentant n'èn els betg d'accord areguard il potentat sirian Assad.
Legenda: Hollande e Putin dattan il maun: Dentant n'èn els betg d'accord areguard il potentat sirian Assad. Keystone

Frantscha n'excluda betg truppas sirianas

La Frantscha n'excluda betg pli che las truppas sirianas da Baschar al-Assad pon sa participar ad in'allianza gronda per cumbatter la milissa Stadi Islamic. Quai ha ditg il minister da l'exteriur franzos Laurent Fabius en in'intervista cun l'emettur RTL.

La regenza franzosa resta dentant tar sia posiziun ch'il president da la Siria stoppia vegnir privà da la pussanza.

Incap aviatic cumplitgescha relaziuns tranter Russia e Tirchia

Pervi che la Tirchia ha sajettà giu in aviun da cumbat russ vul Moscau bloccar acziuns communablas cun la Tirchia. Uschia ha la Russia era annunzià sancziuns cunter la Tirchia: per il pajais da vacanzas popular dals Russ ha il ministeri da l’exteriur da ora in avis da viadi.

RR novitads 06:00 / 07:00 / 11:00

Artitgels legids il pli savens