Exteriur - Hillary Clinton vul turnar enavos en la Chas’alva
Ussa èsi uffizial: Hillary Clinton vul daventar la presidenta dals Stadis Unids. Ella candidescha danovamain per las elecziuns dal president il 2016, annunzia l'anteriura ministra da l'exteriur e First lady sin sia pagina d'internet.
Tar si'emprima emprova il 2008 aveva la democrata da 67 onns pers la cursa cunter Barack Obama. Tenor ses cussegliaders èn ils temas da Clinton en il cumbat electoral surtut l'inegualitad economica e sias schanzas da daventar l'emprima dunna a la testa dal stadi.
Questa decisiun da Clinton spetgavan observaturs gia dapi daditg.
