Siglir tar il cuntegn
cuntegn

Exteriur Havaria sin il Rain en Germania

In bastiment da passagiers svizzer ha gì in accident a Duisburg en Germania. Bunamain 30 persunas èn vegnidas blessadas.

  • Sin il Rain tar Duisburg en Germania è in bastiment da passagiers collidà cun in pilaster d'ina punt d'autostrada.
  • La punt è puspè vegnida averta, suenter che statichers han examinà ella.
  • Tenor la polizia èn 27 persunas vegnidas blessadas, per part grevamain.
  • Ils passagiers derivan per gronda part dals Stadis dal Benelux.
  • Daco ch'igl accident è capità, n'è anc betg cler.

Sin il Rain a Duisburg en Germania è il bastiment da passagiers «Swiss Crystal» siglì mardi saira cunter in pilaster d'ina punt. Il bastiment è immatriculà en Svizra. En ina grond’acziun da la polizia èn las 129 persunas a bord vegnidas evacuadas Fin uss ha la polizia dumbrà 27 blessads. Quatter passagiers sajan vegnids blessads grevamain. Quai ha communitgà la polizia tudestga.

Passagiers dal Benelux

La societad da navigaziun svizra a la quala il bastiment tutga, n’ha fin uss fatg naginas indicaziuns davart l’accident ed er betg davart la ruta dal bastiment. Tenor agenturas tudestgas derivian ils passagiers per gronda part dals Stadis dal Benelux.

Raschun per havaria betg clera

La raschun da l'accident n'è anc betg enconuschenta. L'autostrada A42 che maina sur la punt pertutgada è vegnida serrada per in tschert temp – quai per raschun da segirtad. Suenter che statichers han examinà ella, ha la punt da l'autostrada sur il Rain puspè pudì vegnir averta.

Bastiment da remplazzament

Tenor ils pumpiers da Duisburg ha l'organisatur da viadis mess a disposiziun in ulteriur bastiment per ch'ils passagiers hajan pudì cuntinuar lur viadi. Quai gia circa in'ura suenter l'accident.

Ultra da quai hajan els gì la pussaivladad da passentar la notg en hotels u da sa laschar transportar a chasa.

RR novitads 06:00