Tar l'attatga èn vegnids mazzads quatter Israelians, 7 ulteriurs èn vegnids blessads. Quatter da quels grevamain. Il primminister ha annunzià la notg da prender en mira ulteriurs pass cunter il terror. Quai saja ina sfida, els vegnian però ad accumplir ella. La polizia, las forzas da segirezza e las autoritads vegnian ad agir cun resolutezza, per evitar talas attatgas en l'avegnir.
Sesida dal cabinet da segirezza
Netanjahu ha visità il lieu da l'attentat ensemen cun il minister da defensiun Avigdor Liebermann ed il minister da polizia Gilad Erdan. Ordavant aveva il primminister convocà ina sesida d'urgenza en il quartier dal militar. Per gievgia è planisada ina sesida dal cabinet da segirezza, nua ch'i duai vegnir sa cussegliar davart l'agir.
Hamas gratulescha via Twitter
In manader da la Hamas che regia en la Strivla da Gaza ha ludà l'attatga mortala da dus Palestinais. «Laud e gratulaziuns als abitants da Hebron», ha Ismail Hanija scrit via Twitter. Tenor rapports da medias derivan ils dus attentaders dad in vitg datiers da Hebron en il sid da la Cisjordania.
Hamas annunzia ulteriurs acts da terror
La Hamas ha entant annunzià ulteriuras attatga durant il mais da gigina Ramadan. In pledader da la gruppaziun ha declerà che l'attatga saja ina resposta sin il crim israelian cunter ils Palestinais en la Cisjordania e la Strivla da Gaza.
RR novitads 22.00 / 06:00