Siglir tar il cuntegn

Header

Navigaziun

cuntegn

Exteriur Hackers russ èn in grond privel per l'USA

La Russia haja in program d'informatica fitg sviluppà ed offensiv che furmia ina gronda smanatscha per la regenza americana, han declerà ils servetschs secrets. Periclitada saja l'infrastructura militara diplomatica e commerziala ed indrizs tecnics.

Purtret da computers cun massa cabels
Legenda: Hackers russ duain esser responsabels per la decisiun da las elecziuns per il presidi dals Stadis Unids. Keystone

La Russia dovria tecnicas d'infurmaziun per influenzar l'opiniun publica er en l'Europa e l'Asia. La cumissiun da defensiun dals Stadis Unids aveva envidà ils responsabels dal servetsch secret ad ina audiziun.

Tar questa audiziun saja sur tut ì sur da las attatgas da hackers e desinfurmaziuns durant las elecziuns dal president dals Stadis Unids. President Barack Obama aveva curt avant Bumaun exilì plirs probabels agents russ. Questas sancziuns sajan vegnidas fatgas sin cussegliaziun da tut ils servetschs secrets.

La responsabladad per las attatgas da hackers durant il cumbat electoral american - porta tenor ils servetschs secrets americans il president russ Wladimir Putin. I dettia dentant nagins indizis che la Russia haja manipulà activamain las elecziuns dals Stadis Unids.

La regenza da la Russia ha refusà las rinfatschas. Er il president da l'America futur, Donald Trump è s'exprimì sceptic. Ils servetschs secrets dals Stadis Unids vulan cumenzar proxim'emna cun in rapport davart attatgas da hackers pussiblas.

La responsabladad per las attatgas da hackers durant il cumbat electoral american - porta tenor ils servetschs secrets americans il president russ Wladimir Putin.

RR novitads 07:00